Anker-in suya üzməyi bacaran portativ dinamikası

Ankerin səs texnologiyaları sahəsində fəaliyyət göstərən Soundcore alt brendi, suya üzən və qum təmizləyici xüsusiyyətinə malik yeni portativ dinamikasını təqdim edib. Boom 3i adlı bu model, xüsusilə də çimərliklər, göllər və hovuzlar kimi açıq havada istifadə üçün hazırlanıb.

IP68 sertifikatı sayəsində suya və toza qarşı tam müdafiə təklif edən dinamik, yalnız şirin suya yox, həm də duzlu suya davamlıdır. Soundcore Boom 3i, tamamilə suya batmış olsa belə, 2 ilədək korroziyaya qarşı müqavimət təmin edən xüsusi örtüyə malikdir. Üzmə xüsusiyyəti sayəsində Boom 3i suya batmadan üzə bilər, həmçinin suya düşdükdə həmişə yuxarı vəziyyətdə qalır. Bu dizayn isə istifadəçilərə üzgəndə musiqi dinləməyə imkan verir.

Cihazın digər diqqətçəkən xüsusiyyəti isə dinamikin hər iki ucunda yerləşən LED işıqlardır. Bu işıqlar musiqinin ritmi ilə sinxronlaşa bilər və ya sadəcə ətraf mühit işıqlandırması kimi istifadə edilə bilər. Dinamik qəfəsinə qum və ya toz düşdükdə aktivləşən "Buzz Clean" adlı təmizləmə rejimi də mövcuddur. Bu rejim, səthdəki hissəcikləri təmizləmək üçün yüksək tezlikli titrəmələr yaradır.

Boom 3i, 96 desibelə çatan səs gücünü yalnız musiqi üçün deyil, həm də lazım olduqda təcili hallarda siqnal kimi istifadə etmək mümkündür. Soundcore-un mobil tətbiqi vasitəsilə idarə olunan dinamik, telefonun mikrofonu vasitəsilə megafon kimi də istifadə edilə bilər. Cihaz təxminən 139 dollar qiymətə satışa çıxarılıb.