Marvel Kainatı Yeni Bir Dövrə Qədəm Qoyur

2026-cı ilin yayında gözlənilən "Avengers: Qiyamət Günü" və ardınca "Avengers: Gizli Müharibələr" filmləri ilə Marvel Kinematoqrafiya Kainatı yeni bir dövrə qədəm qoyur. Marvel prezidenti Kevin Feige, həftə sonu keçirilən mətbuat konfransında studiyanın gələcək planlarını açıqlayıb.

Feige bildirib ki, "Gizli Müharibələr" yalnız bir hekayənin yekununu deyil, həm də Marvel Kainatı üçün yeni bir dövrün başlanğıcını qeyd edəcək. Feige-nin sözlərinə görə, "Avengers: Gizli Müharibələr" filminin əsas məqsədi "Endgame"dən bəri başlayılan bütün Marvel hekayələrini tək bir nöqtədə birləşdirib yekunlaşdırmaqdır. Bununla da Marvel Kinematoqrafiya Kainatı "yenidən qurulacaq". Feige bu prosesi "yenidən başladılma" yox, "yenidən qurulma" kimi təsvir edir. Başqa sözlə, kainat sıfırdan yaradılmayacaq, mövcud çoxlu zaman xətləri birləşdirilərək vahid bir zaman xəttinə keçid ediləcək.

Studiyaya məxsus bu addım həm mövcud personajlarda, həm də kainatın ümumi quruluşunda köklü dəyişikliklər deməkdir. Kevin Feige qeyd edib ki, "Avengers: Endgame" sonluqlar haqqında, "Gizli Müharibələr" isə başlanğıclar haqqında olacaq. Yeni dövrün yalnız yeni personajlarla deyil, həm də yeni hekayə quruluşları və əlaqələrlə qurulacağı bildirilir.

"Gizli Müharibələr"dən sonra ən çox dəyişikliyə məruz qalacaq sahələrdən biri də X-Men olacaq. Marvel əvvəllər "Avengers: Qiyamət Günü" və "Gizli Müharibələr" filmlərində keçmiş X-Men aktyorlarının geri qayıdacağını açıqlamışdı. Lakin bu aktyorlar "Gizli Müharibələr"dən sonra Marvel kainatından tamamilə ayrılacaqlar. Layihə yeni X-Men aktyor heyəti ilə davam etdiriləcək. Bu heyətin iştirakı ilə çəkiləcək ilk X-Men filminin rejissoru "Thunderbolts" filminin rejissoru Ceyk Şrayer olacaq.

Təxminən on ildir çoxlu kainat və zaman səyahəti mövzularını araşdırandan sonra Marvel gələn illərdə daha sadə, daha mərkəzləşdirilmiş və yenidən qurulmuş bir hekayə kainatı yaratmağa hazırlaşır. "Gizli Müharibələr" bu keçiddə ən vacib addım hesab olunur. Filmlərin aktyor heyəti, ssenari detalları və çəkiliş cədvəli ilə bağlı Marvel tərəfindən əlavə elanlar hələlik edilməyib.